मिडियामा समान सहभागिता हुनुपर्छ ः किशोरी सिर्जना

सिन्धुली–विगतदेखि वर्तमानसम्मको परिस्थितिलाई दृष्टिगत गर्दा समाचारमा मात्र नभइ जुनसुकै क्षेत्रमा पनि महिला र पुरुषविच असमानता नै देखिन्छ । राजनीतिक,आर्थिक,शैक्षिक लगाएत समग्र पक्षमा महिलाहरूको सहभागिता न्यून देखिन्छ ।

जति सहभागी हुन्छन्,उनिहरुलाई पनि खासै महत्व दिइदैन । पत्रपत्रिकामा समाचार छाप्दा पनि पुरुषका विषयलाई बढी महत्व दिने गरेको पाइन्छ । मिडियाहरुले अन्तरवार्ता लिँदा पनि पुरुषहरूको बढी लिने गर्छन् ।

चलचित्रका क्षेत्रमा पनि महिलालाई प्रायजसो घरायसी काममा देखाइएको हुन्छ । प्रमुख भुमिका भने पुरुषको नै हुने गर्छ । छोटो कपडा लगाएर फेसन सो गर्ने ठाउँमा भने महिलाहरुलाई देखाइएको हुन्छ । यस्ता कुराबाटै बुझ्न सक्छौ कि, हामी किशोरी,महिलालाई मनोरञ्जनको साधनका रूपमा लिने गर्छन् ।

बालबालिका,किशोरी,महिलाहरुमा क्षमता नभएको त होइनन् । तर उनीहरुको आवाजलाई मान्यता दिइदैन । समय र प्रविधिको परिवर्तन भएसंगै हिंसाका स्वरुपमा पनि परिवर्तन हुँदै आएको छ । दिन प्रतिदिन हत्या,हिंसा र बलात्कार जस्ता घटनाहरु तिव्र रूपमा बढिरहेका छन् ।

कतिपय घटनाहरु त दवावले बाहिर आउदैन् । आइहाले पनि पीडित थप पीडित हुनु पर्ने अवस्था छ । अहिले संचार माध्यममा विषेश गरि राजनीतिक विषय विशेष स्थान ओगटेको छ । आधी आकाश ओगट्ने महिलालाई किन हरेक क्षेत्रमा समावेशी रूपमा सहभागी गराइदैन ? भोलिका कर्णधार बालबालिकाहरुको आवाजलाई किन सुनिदैन ?

किशोरी,महिलाहरु किन जुनसुकै ठाउँमा असुरक्षित छन् त ? बढ्दो हिंसाको सवालमा आम महिला,बालबालिका,किशोर किशोरीहरुको धारणा कस्तो छ ? यस्को न्यूनिकरण गर्न सम्बन्धित सरोकारवालाहरुको भुमिका के रहन्छ ? र किशोरी संजाल,महिला संजाल,युवा संजाल,क्लवहरु र नागरिक समाजको भुमिका,हिंसा न्यूनिकरण गर्न भइगरेका प्रयास र सफलताका विषयलाई पनि समावेशी रूपमा प्रस्तुत गर्नुपर्छ । त्यसैगरि हरेक क्षेत्रमा उनीहरुको इच्छा,आकाङ्क्क्षा र धारणालाई पनि समान रूपमा प्रस्तुत गर्न आवश्यक छ ।

किशोरी सिर्जना तामाङ प्रशिक्षार्थी पत्रकार हुन् ।