सिन्धुली अपाङ्ग महिला सङ्घको स्थापना दिवसको अवसरमा शुभकामना आदानप्रदान

सिन्धुली अपाङ्ग महिला सङ्घको पाचौं स्थापना दिवसको अवसरमा आज शुभकामना आदानप्रदान कार्यक्रम गरिएको छ । सिन्धुलीको कमलामाई नगरपालिका ४ सिताराम पाटी प्यालेसमा कार्यक्रम गरिएको हो । कार्यक्रम क्यालेन्डर विमोचन तथा अपाङ्गता भएका महिलाहरूको यौनिकता एवम् प्रजनन स्वास्थ्य अधिकार सम्बन्धी अन्तरक्रिया गरिएको छ ।

कमलामाई नगरपालिकाका उपप्रमुख मञ्जु देवकोटाले सिन्धुली अपाङ्ग महिला सङ्घ सिन्धुलीलाई स्थानीय सरकारले वार्षिक बजेट विनियोजन गरेर समिति निर्माण गर्नलाई सहज करणको लागि पहल गर्ने बताउनु भयो । कसैले पनि चाहेर या सोचेर अपाङ्गता नहुने उहाँको भनाई छ । अपाङ्गताको क्षेत्रमा पहिचानको आधारमा प्रत्येक वडामा अपाङ्गता भएकाहरूको डेटा सहितको अवस्था प्रकार वा प्रकृति सहितको योजना पेस भएमा आवश्यकता अनुसार बजेट विनियोजन गर्ने प्रतिबद्धता व्यक्त गर्नु भएको छ ।

त्यस्तै कार्यक्रममा सिन्धुली अपाङ्ग महिला सङ्घ सिन्धुलीको अध्यक्ष दिल कुमारी देवकोटाले अपाङ्ग महिला सङ्घ सिन्धुलीले सिन्धुलीको नौ ओटै स्थानीय तहमा काम गर्दै आएको बताउनु भयो । उहाँले दिवसको अवसरमा क्यालेन्डर विमोचन गर्न पाउँदा खुसी भएको र आफूले संर्घष गरेको सम्झनाको लागि क्यालेन्डरले ऊर्जा थपिएको बताउनु भयो ।

त्यस्तै उहाँले अपाङ्गता क्षेत्रमा आएको समुदायमा आधारित पुनर्स्थापना सिपिआर कार्यक्रम, जिल्लामा काम गरिरहेको संस्थालाई नदिएर बनेपाको अस्पताललाई दिएकोले कार्यविधि विपरीत भएको कारण तीन पाटन गाउँपालिका र मरिण गाउँपालिका सिन्धुली विरुद्धमा मुद्दा समेत लडेको बताउनु भयो । मुद्दा आफ्नो पक्षमा आउने उहाँको भनाई छ । आगामी दिनमा जस्तै सुकै समस्या आए पनि अपाङ्गता भएको ब्यक्तिहरुको क्षेत्रमा उभिएर आफूले काम गर्ने उहाँको भनाई छ ।

सिन्धुली अपाङ्ग महिला सङ्घ सिन्धुलीको आयोजना तथा कमलामाई नगरपालिका ४ र ह्याण्स नेपालको सहयोगमा कार्यक्रम सम्पन्न भएको हो । सिन्धुली अपाङ्ग महिला सङ्घ सिन्धुलीका अध्यक्ष दिल कुमारी देवकोटा (दिपा) को अध्यक्षयता तथा कमलामाई नगरपालिकाका उपप्रमुख मञ्जु देवकोटाको प्रमुखआतिथ्यतामा भएको कार्यक्रममा जिल्लाका सरोकारवाला निकायहरुको उपस्थिति रहेको थियो ।